Question

Kudu kumaha dina ngagunakeun basa lamun urang nyieun surat resmi?

Answer 1

Dina urang nyieun surat, boh surat resmi boh surat teu resmi, basa Sunda rada beda jeung basa Indonesia. Bedana nyaeta dina ragam basa atawa tingkatan basa anu digunakeun. Sanajan dina basa Indonesia oge tangtu aya ragam basa anu digunakeun, saperti ragam basa lemes jeung ragam basa kasar, tapi dina basa Indonesia henteu sarumit ragam basa nu aya dina basa Sunda. Ragam basa nu aya dina basa Indonesia leuwih saderhana tibatan nu aya dina basa Sunda.

Dina basa Sunda aya sawatara tingkatan basa, ti mimiti anu paling lemes nepi ka paling kasar. Dina basa Sunda kungsi kacatet nepi ka aya 8 tingkatan basa, nyaeta 6 tingkatan basa lemes jeung 2 tingkatan basa kasar atawa basa loma. Tapi kiwari geus sacara resmi ditangtukeun yen dina basa Sunda ngan saukur aya dua tingkatan basa, nyaeta Ragam Basa Hormat jeung Ragam Basa Loma.

Sanajan ayeuna dina basa Sunda geus sacara resmi ditangtukeun ngan aya dua tingkatan atawa ragam basa, henteu ngajadikeun yen basa Sunda anu ayeuna jadi sarua jeung basa Indonesia dina kasedrhananaan ragam basana. Jadi dina nulis surat resmi anu ngagunakeun basa Sunda perlu diperhatikeun sacara cermat ragam basa anu digunakeun. Contona, dina basa Indonesia, surat resmi ti Kepala Sakola ka Ketua OSIS jeung surat resmi ti Ketua OSIS ka Kepala Sekola bisa wae ngagunakeun ragam basa anu henteu beda.

Tapi dina basa Sunda beda. Surat resmi ti Kepala Sakola ka Ketua OSIS bisa ngagunakeun Ragam Basa Loma, tapi surat resmi ti Ketua OSIS ka Kepala Sakola teu bisa ngagunakeun Ragam Basa Loma. Surat resmi ti Ketua OSIS ka murid atawa anggota OSIS bisa ngagunakeun Ragam Basa Loma, jeung surat resmi ti anggota OSIS ka Ketua OSIS bisa ngagunakeun Ragam Basa Loma. Jadi dina basa Sunda, hal anu paling penting dina nulis surat resmi nyaeta ragam basa anu digunakeun kudu merenah.