Question

Jentrekeun wangun jeung pola ( rumus sisindiran )

Answer 1

Sisindiran nyaeta salahsahiji rupa puisi Sunda. Aya dua rupa puisi anu aya dina sastra Sunda, nyaeta puisi anu eusina mangrupa carita jeung puisi anu eusina henteu mangrupa carita. Sisindiran kaasupna kana puisi Sunda anu henteu mangrupa carita. Conto puisi Sunda anu eusina mangrupa carita nyaeta saperti wawacan jeung carita pantun. Sedengkeun conto puisi Sunda anu eusina henteu mangrupa carita, salian ti sisindiran, nyaeta mantra, guguritan jeung sajak.

Umpama dina sastra Indonesia, sisindiran sarua atawa mirip jeung pantun. Saperti disebutkeun di luhur, dina puisi Sunda oge aya anu disebut carita pantun. Carita pantun beda jeung pantun anu aya dina sastra Indonesia atawa sisindiran nu aya dina sastra Sunda. Umpama carita pantun nyaeta puisi Sunda anu mangrupa carita, sisindiran mah nyaeta puisi Sunda anu henteu mangrupa carita.

Umpama ditilik tina wangun kekecapannana, aya tilu rupa sisindiran, nyaeta anu disebut paparikan, rarakitan jeung wawangsalan. Sedengkeun umpama ditilik tina eusi atawa maksudna, aya sisindiran anu eusina mangrupa piwuruk, aya sisindiran anu eusina mangrupa sislihasih, jeung aya oge sisindiran anu eusina mangrupa sesebred atawa heureuy. Dina sapada paparikan jeung rarakitan aya opat jajar atawa padalisan. Sedengkeun dina sapada wawangsalan aya dua padalisan.

Dina sapadalisan sisindiran biasana aya dalapan engang atawa suku kata. Dina sisindiran aya bagean anu disebut cangkang jeung bagean anu disebut eusi. Dina paparikan jeung rarakitan, padalisan kahiji jeung padalisan kadua mangrupakeun bagean cangkang, jeung padalisan katilu jeung kaopat mangrupakeun bagean eusi. Sedengkeun dina wawangsalan, padalisan kahiji mangrupaakeun cangkang, padalisan kadua mangrupakeun eusi.